Nagulimek Dagiti Billit Tuleng

Naulimek ti angin, kumkumpasanna’t aweng
Ken sagawisiw dagiti billit tuleng
A dangdanggayan met dagiti bulong
Mangliklikmot naiisem a sabsabong
A mangpaypayapay, mangaw-awis kenka
Tapno makipagragsakka kadakuada.

Immisemka, ngem apay a napait
Naibus kadin isemmo a nasam-it
Imbunbunongmo kadagiti papagayam
Inarub-obda kadin a naminpinsan?
Naatianan kadin daydi bubon
Pagsaksakduan isemmo naruay a kas danum?

Idiay laud, aggargarakgak ti init
Mangbuybuya mulmula a masinsinit
‘Di mangikankano kadagiti sangit a maip-ipit
Ken rungaab dagiti mula a naiburang-it
Agpapaarayat, dumawdawat iti asi
Sangkabassit a danum a maiwarsi.

Naikulengka, ngem apagapaman laeng
Ta pagamuan adda nangikut kenka nga aweng
A nangidiktar iti aramidem. Wen, gayyem
Luam nagarubosda, ket dagiti mula nagungarda
Ngem anian, saanmon a nakita nasam-it nga isemda
Ta idin, pagayam, ket naglusdoyka.

Nagulimek metten dagiti billit tuleng.


//Sherma E. Benosa;
March 20, 2007