Pannagna

Nakatapaya dagiti naibulos a sennaay
Kadagiti uneg agkarapaay a nakem
Ta kas man tunggal umaddang ti namnama
Adda mangibalud a pannakaiwawa.

‘Di makakunail aglulupoy a simbeng
Nagaburan ‘di agpakatalna a panagbuteng
Ta kas man tunggal umagek ti kired
Adda kullayaw a mangiparnged.

Agragutok dagiti barukong ti aripapa
Kadagiti agpaspasnaay a rikna
Ta tunggal sumirip agur-uray a masakbayan
Adda alliaw a mangsalukob iti agdama.

Manguddakudday pannagna ti panawen
Dagiti agkaraitublak, agluluken a tumeng
Ngem tumakderak latta, magnaak manen
Tapno layawek nakaigarugungan a yuyeng.


//Sherma E. Benosa
06 August 2008; 9:50 am

Dayasadas ken Tarakitik

(Dua a Daniw a Maymaysa't Kaipapananda)


Dayasadas
(iti tawa ni sherma)

Dayyengnaka’t naumbi a nakaparsuaan
A kumkumpasan nalung-ay nga angin;
Is-iseman apagapaman a dariwanawar
Ti saguyepyepen nga agsapa.

Samiwengka a makaila; mangitunda’t
Alinegneg ti karayan ti agay-ayus a rikna;
Lagip bumangonda manipud mananglilipat
Nga isip; inaprosan nalamuyot a pul-oy.

Saibbeknaka’t naliday a nakaparsuaan
A dangdanggayan makipagrikna a palayupoy;
Im-imdengan pumakpakada a sipnget
Ti napuyatan, linammin a rabii.

Saning-ika a makauloy-rikna; mangitulod
Mangliwengliweng a yuyeng ti napaksuyan
A barukong; dagensen rumekkasda manipud
Nakaitalimengan a siled; puso a simked.

Ritmom, di agpaltos, agingga di agsarday
Bayakabak a mangsibug nagregkang a daga;
Kas met la bitek ti barukong; di umingga
Agingga adda anges ti napuyotan-a-tapok.


//Sherma E. Benosa
17 October 2007; 1:48 am



Bayakabak, Tarakitik
(a mangmangngeg ni VF iti kuartona)

Kansionka’t naragsak a lubong
A salaen ti naumbi a palayupoy
Palpaludipan dumteng nga anaraar
Ti agdudungsa a nasapa a bigat.

Musikaka a makailili; mangiturong
Alinsaed ti waig ti agar-aruyot a bitek;
Nagawan a ladawan ni lagip, nagsubli;
Dinuayya’n pug-aw naimnas nga ulimek.

Saning-inaka’t nakaiyanakan
A salsalaan makidanggay a palayupoy;
Dengdenggen agpukawen a riwet
Ti di nakaturog, nagkutimermer a kaltaang.

Ibitnaka a manggudas-rikna, mangiturong
Gayung-gayong a kalawakaw ti nabannog
A barukong, im-impen rumkuasda manipud
Nakaidulinan a sagumbi; bimmato a puso.

Kumpasmo di agriro, agingga di agtunged
Bayakabak a mangep-ep mawaw a rengngat;
A kas iti arungaing ti puso; di agpatinga
Agingga nga adda anges, pinarsua iti pitak.

//Clifton Pascua
18 October 2007

Kuliapis Nga Ay-ay

Makasiram ti apuy a sumgiab iti kaunggan ni ngata-ngata
Ket puoranna ti simbeng ti panagdaliasat ti agduadua a kararua
Dagiti agkatangkatang a dapan nga inulila ti nailibay a darepdep
Nga indaramudom ti kasipngetan, inadipen nagkaadu a derrep.

‘Di madaeran kuyep a mata ti makipinnerreng iti masakbayan
A tagtagibien aliaw impasngay kalman a di man la nagbalasang
Iduduayyan’ pilay nga agdama a nagpanawan narasi a namnama
Ilallallay saning-i ti dung-aw dagiti umar-arubayan nga aligaga.

Madaeranto ngata ti kired ni Elpis ti bang-i ti espiritu ni Moros
A nangkaras ubbog ni talinaay, nangruros sabong ti kurkuros
Idinto nga agsung-aben dagiti kalman a ramut a baglan ni puot
A dalanen koma dagiti sagibsib ngem inalun-on metten ni pungtot?

Uray la agallangogan dagiti sennay ti nakas-ang a pannakapaay
Ngem saan met a sumngaw dagiti boses ti kuliapis nga ay-ay.


Check out other version HERE. Or, read my other attempts at poetry HERE.


//Sherma E. Benosa
09 May 2008; 10:15pm

Dagaang ti Abril

Salemsemen ti rikna
Iti dagaang ti Abril
Ta agbalayen ti dara
Iti lamiis dagiti arakup.
Nakuturan ket ngata
Dagiti naulila a parmata
Dagiti kimter a darang
Ti nasebseban a pluma.
Ta nupay makapurar ‘ta lawag
Sipnget latta met ti makita
Ta kimmudrepen dagiti mata
Ti narikpan a puso.
Awan met ngaminen
Dagiti makaay-ayo a buya
Liwliwa agkukutel a rikna.
Ta agsalawasaw metten
Dagiti talawataw a saka
Ken agkusilapen
Dagiti siping a dila.

//Sherma E. Benosa
18 April 2008; 3:25pm
.

Iruruk-at

.
‘Di mawingiwingan naumbi nga awis
Agur-uray panagtalaytay manen
Dara kadagiti urat ti napipikel a nakem

Ta nupay impierno ti makalunag iti bato
Saan a maigawid panagbitek ti puso.

Maatiananto dagiti bubon ni sanaang
Umarakupto met laeng bara ni alikaka
Ket maruk-atanto naibalud a simbeng

Ta nupay natulawan nagpakadan a kalman
Adda minas a nasikkarud dagiti dapan.

.
//Sherma E. Benosa
09 June 2008; 12:45am
.

Iti Kannag ti Kaltaang

.
Agtadekak man, ta naiwagatkon a namimpinsan
Dagiti aliaw a nangadipen iti kaunggan.

Ta awandan a matimudko dagiti aligagaw ni buteng
Tunggal lumabas iti paraangan agal-allangogan
Nga arimpadek dagiti agkalkallautang nga anniniwan.

Makiin-innisemak met ngaminen iti kannag ti kaltaang;
Isu a wen, gayyem, patiek a namimpinsan
Nauman nga agsaknap dagiti nadawel a lidem
Nausawan ket ngatan ti nangbartek kadakuada nga ilem.


//Sherma E. Benosa
27 April 2008; 10:46am
.

Balasang ti Bambang

Kansionanka man, O balasang ti Bambang
balasang a napintas nga innak pagrukbaban
itoy nga aldaw nga inka panagkanaganan
panagtaom, ita ken iti agnanayon, diakto kalipatan.

Isagutko kenka toy ayatko a nagpaiduma
bitbituen sadiay langit, purosekto amin ida
inayonko diay bulan aramidekto a kas korona
nga ibalangat dita ulom, selnaganna ‘ta sadia.

Iyawatko a naimpusuan dagiti pinilik a rosas
karagupna metten dagiti napudno nga arasa-as
ti talingenngen ni Kari, saanto a manasanas
panangtagiben kapia-ni-tulag, dinto pulos agkupas.

Itden koma ti Apo ita nga aldaw a panagkasangaymo
pannakataginayon ni ragsak, regta, salun-at ken dungngo
ni pangipateg ken ni Ayat, agsadag dita barukongmo
tapno inta manibi dagiti tarigagay ken kari ti dua-a-puso.

Kansionanka ngarud O Pintas ti Bambang
sapata ni kinapudno dim’ to koma kalipatan
ta awanton sabali nga innak tarigagayan
no di ‘ta ayatmo, Anghel nga innak pagraywan.


//Birthday song from Mr. Clifton Pascua
March 2007

Ngamin ta Sika

(SEB, sikat’ gapuna)



Tunggal kadi lapgisek pinanid dagiti aldaw
Ni panagtuok; saning-i ni ar-araraw
Nga itden ti saem ni tuok ni panaguray
Kararuak a mapirpisay, maidalit ken liday?

Saan.
Ngamin sikat’ aldaw ni ganaygay.


Innak kadi samiren dagiti nasamek a babaet
Ni alla-alla a nabeltak; nasipnget a ginget
Ken burubor mangliwengliweng a panagdudua,
Malmesak ken liday, kawaw kadi a sirmata?

Saan.
Ngamin sikat’ rangtay unnoy ni namnama.



//Clifton Pascua
12 April 2008

Lamina ni Ayat

Wen, addada latta a sumangbay
Dagiti di matmaturog a namnama
Lumtuadda kadagiti sagumaymay
Ni ragsak, agtaud kaunggan rikna;
Ta addada latta marikna a kinadarisay
Kadagiti ipagpaganetget dagita ikikita.
Ala, addaak latta ngarud nga aguray
Idadateng naisangsangayan nga agsapa.

Idayyengko ngarud dagiti aweng ni iliw
Ta isuda man mangiyarakup liwliwa
Kumpasak allangogan ni sagawisiw
Dagiti makabang-ar rikna a sonata;
Bareng ‘di agbayag sumungadton ni ayat
Mamagungar natuokan a kararua.
Koma, ket isangbayton’ baro nga agsapa
Laminan’ ayat, pinagkaysa ni namnama.


For cP. Happy 23rd month tomorrow, Buddy. yy10ka. :-)


//Sherma E. Benosa
11 April 2008; 2:35 pm

Kenka, Pagayam

.
Aglangoy, agkuy-atka, pagayam
Ket batukem taaw a pagtaptapawam
Bareng naidulin a gameng iti lansad
Di masasaan nga inka mabirokan.

Agtayab, agampayagka, pagayam
Wanawanam law-ang a nakaikariam.
Bareng nasusudi a tagtagaimpem
Maragpatmo, inka maikutan.

Magnaka, itarengtengmo, gayyem
Ket surotem desdes a namayengmeng
Bareng naibudi a kaipapanan
Naan-anaymonton a maawatan.

Ngem sapay koma, pagayam
Ta inton nakadanonkan iti papanam
Ket mapanunotmonto a taliawen ni kalman,
Maysaakto kadagiti mailangaam.

Bay-am a siak ti segden ti parola
Kadagiti taaw a pagdaliasatam
Ket siakto ti inka pagpatawan
Kenni atab a mangyaw-awan.

Kadagiti law-ang a daliasatem
Makipagtayabak, saan nga aleng-aleng;
Ta siakto ti anginmo,
Mangbagkat natibker a payakmo.

Ket kadagiti desdes a surotem,
Addaakto latta, awan dudua
Ta siakto’t mangkibin kenka
Iti tiempo’t samuyeng, pannakaikawa.

Ala, agtuloyka, ‘di ka agsarimadeng
Ta agkurnoak kenka, gayyem;
Dagiti luluak, ladawan ti ragsak
Panangtun-oymo nabalitokan nga arapaap.


//A poem for my good friends who have left: Chie and Jing Fallarna and Celestine Bersabal. God bless you. I am so glad God put you in my life. You are among the treasures I cherish in my heart. I love you. Good luck.

When the nudge for me to write came, I had thought of writing in English, so that my non-Ilokano friends for whom this piece was written would understand it and they would know how I feel for and about them. But when I finished writing it, I realized it was written in a language they do not speak. I tried to translate it, but somehow, I was inadequate; the right words just wouldn’t come. It was after several hours that I realized that maybe there’s no need for me to translate this; that it was written exactly as it should, because they already know how much they mean to me.

.
//Sherma E. Benosa
02 April 2008; 11:10am

Manto ni Aligagaw

Dukotka ni ulpit, saligemgem ni buteng
Kuspag ti pasamak, kari nga aleng-aleng
Maysaka a bambanti, taguob ni allilaw
Anniniwan ni pangta, manto ni Aligagaw.

Langebka a simmangbay, nagmanto a lawag
Ulaw ti kararua, mangyaw-awan a dalagadag
Sumyagka a sumangpet kasigud mo’t tabbaaw
Maysaka a bambanti, manto ni Aligagaw.

Panagpagem nalamiis a tawa a pagtaptapayaak
Layusem ti paladpad, lugar pagar-arapaapak
Lemmesem karayo, aramidem a parparawpaw
Maysaka a bambanti, manto ni Aligagaw.

Iwasawasmo, purosem ni namnama, tinnagem
Lukaisam kurtinak a pinaglumenen ti panawen
Unnoyko ken pakaasi, impatom a salawasaw
Maysaka a bambanti, manto ni Aligagaw.

Linibasmo daydi impategko a puso a bagnos
Inuyusmo’t alintataok, turedko’t naigusugos
Dati a kanta iti kaltaang, nagbalindan a kawaw
Maysaka a bambanti, manto ni Aligagaw.

Ibaludnak kadagiti diding a pinapusiaw ni saem
Nangisit nga anniniwan ti inka pinagtaeng
Dati a talingen-ngen ni tured, siakon ti alawaaw
Maysaka a bambanti, manto ni Aligagaw.


(*written at the middle of the night while sitting in my living room watching the rain whipping my window panes.)

//Clifton P. Pascua
17 December 2007

Seranada

Tagaimpek ti adda man koman dita sibay
Manipud nasam-it a pannakailibay.
Riknaen lamuyot angin a sumangbay
Buyaen dagiti bituen nga agkiraykiray.
Tagaimpek ti adda man koman dita sibay
Dagiti paddekko’t maaddaan ganaygay
Mangiturong kaniak kenka, ala sapay
Ta dita saklotmo awanton ni upay.

Ti samuyeng ni iliw indanto agpukaw
Iti sipnget ken yuyeng adalem a dan-aw.
Bang-i ni naglabas, lemmesen ni ayat
Kas diro ni tagainep, nargaan pusaksak.
Aggarakgakto’t mangrabrabii a pittagaw
Pannakauyos angesko, diakto agaligagaw.
No gasatko laeng iti matay, riknak natalinaay
Sam-itek pannakapasag, lagipmo a naruay.

Bangonennak Imnas, punasem dagiti daginsen!
Dinak ikalang, dinak lipaten, biagko’t alawem!
Iburaymo dayta ayatmo, agekmo dimo italimeng
Kadagitoy matak, bibigko nga agkusnawen.
Matmatam kadi biagko, rupak a nabessag
Denggem toy puso, bitekna’t madagdagdag
Idennesmo ta barukong, ayatmo a naruay
Uray laeng tagainep, umayak kenka sumangbay.

(*inspired by Percy Bysshe Shelley’s Indian Serenade)

//Clifton Pascua

Abungot

Sangarakem dagidi a balikas
Inyabrasa natibong a katkatawa
Intalimeng lansad ti kaunggan
Pammasingked a nangngegan.

Ngem ubbaw dagidi a sapata
Inyebkas balangkantis a rikna
Manglimlimo nalanay a mata
Kinatarnawda’t nagpatingga.

Maysa kadi laeng a parmata
Kinasayaat nga inka impakita
Ta idi pidduaek ti kumita
Kinaulboden ti nangbalkot kenka?

Agallangogan man ti barukong
Ti naguliban a kinapudno
Ta daydi kinadarisay a sinappupo
Ubbaw met gayam a sursuro.


//Sherma E. Benosa
22 November 2007; 10:24pm

Linnaaw

Sumilap-silap natarnaw a linnaaw
Nangpalangto manen apagbukar
A petalo ti baro nga agsapa;
Mangipaspasimudaag ngata
Nalangto nga agmalem
Wenno mangmangted kired
Tapno masaranget puor ti init
Ti kararua; bareng laeng saan a kumriit
Ti pakinakem iti pannakibakalna
Narungsot nga agmalem.

Lua ti nagpakadan a rabii,
Pagbiagan sumangbay nga agsapa;
Namnama agpangadua a nakem
Nangugas dudukot indateng
Dagito kanito a naglabas.
Tapno adda kired a mangpasangbay
Isisingising manen dagiti pannubok;
Tapno madaeran dagiti dumteng a mamaglaylay
Nasudi a tartarigagay.
Ket agtalinaed koma a sitatakder
Puon a maibilag nadawel a panawen.


//Sherma E. Benosa
21 December 2007; 12:21am
.

DUATAs

.

WIND'S WHISPERINGS

The sweet melody of the gentle wind’s whisperings
They make my heart flutter with silly reminiscings.
The memory of your eyes brimming with promises
They still linger, the feel of your soft, gentle kisses.

They still linger the feel of your soft, gentle kisses
The memory of your eyes brimming with promises.
They make my heart flutter with silly reminiscings
The sweet melody of the gentle wind’s whisperings.

For MCP… Missing you…

//Sherma E. Benosa
08 November 2007; 11:20pm


ISEM

Isemmo makapabang-ar rikna
Kas palayupoy agmurmuray nga agsapa;
Petalo agbukar a darikmat
Mangidateng naruay a ragsak.

Mangidateng naruay a ragsak
Petalo agbukar a darikmat;
Kas palayupoy agmurmuray nga agsapa
Isemmo makapabang-ar rikna.

//Sherma Benosa
11 November 2007

Lansad ti Barukong

Batukek naitalimeng a gameng
Lansad ti pangadaywen a barukong.
Bagnosko ti ‘di agsarday a bitek
Dagiti aglabas a kanito; arimpadek
Dagiti ‘di makaidna nga agsapa
Kaduak nga agpaspasungad isasangbay
Managladladaw a namnama.

Mapukpukaw man ngatan simbeng
Dagiti ‘di mapangnamnamaan a kired
Dagiti narasi, nalupoy a nakem.
Wenno naiwagatda man ket ngatan
Ti naiyawat kadakuada a talisman
Naisangrat a panggatang paspasungadan
Nakanginngina a masakbayan.

Lumned-tumpaw a kaunggan
Agkalkallautang iti nalawa a taaw
A naiyaplag iti nagbaetan;
Malisianna ngata’t umay a dawel
Agipangpangta iti pannakatalimpungaw?
Wenno malasatanna ngata’t kinadangkok
Dagiti allon ti awanan asi a taaw?

A, bay-am kad’ man dagiti panagdudua
Umayda man ket ngatan a mangal-alia.
Bay-am kad’ latta dagiti ubbaw a pangta
Aggandat a mangburibor sin-aw ti nakem.
Basta kaduak nga agkuy-at ayatmo
Ken ‘di agsarday pammateg nga itdem
Lumung-awakto lukong barukongmo; nakaisem.


//Sherma E. Benosa
9 January 2008; 1:57am

Tawa ti Panunot

Tawa ti panunot ilukatka ta kayatko nga imatangan
Nadumaduma a buya naipinta iti law-ang, nakaibugasan
Agsasabali a maris, agsasallupang a kaipapanan.

Babassit unay dagiti regkang kadagiti tinidtid a diding
A pagsiripsiripak; di makaanay dagiti abut tapno makitak
Pakabuklan, panagsisinninggalot nagkaadu a ladawan.

Ilukatko nakarikep a bulongmo ta kayatko’t sumagrap
Nalangto a kapanunotan, agsasabat iti nalawa a paraangan
Tapno pumariir, lumawag nanumo a siled nga ayan.

Iwalinko dagiti kurtinam ta kayatko’t makiminnatmat
Kadagiti adal nga aglabas-labas; ta bareng laeng kunak
Addanto met sumagmamano a mangtaliaw, umisem kaniak.

Agtakderak iti abaymo a tumammidaw, bareng selnagannak
Nalailo a bulan wenno kiddayannak naisem nga init; maluktan
Panunot a nakullaapan ken kidem-a-mata; ket lawag agsaknap.


//Sherma E. Benosa
2 November 2007; 4:02am

Nalailo Ti Umar-arubayan nga Agsapa

Nalamuyot angin-parbangon ken angep
Nangbalkot nakaturog a tagainep
Nangdalepdep salemsemen a rikna:
Nalailo ti umar-arubayan nga agsapa.

Naragsak samiweng dagiti taraken
Mangpaspasungad aranaar a dumteng
Marikna, yik-ikkisda a sangapada:
Nalailo ti umar-arubayan nga agsapa.

Naisem ti sumirsirip a raya ti init;
In-inut, naparmek agkapsuten a sipnget;
Makikinkinnumusta nalalangto a mula:
Nalailo ti umar-arubayan nga agsapa.

‘Di makaidna agpaspasangbay a rikna
Dagiti mata, sangkataliawda't daya
A sumungadan ti baro a namnama:
Nalailo ti umar-arubayan nga agsapa.


For my "Nalailo nga Agsapa.” Hope you’ll be home soon, Buddy.


//Sherma E. Benosa
28 October 2007; 9:41 pm

Bukel

Ti bukel nga intukitko
a sinibugak iti lailo,
ayat ti pinangaladko,
dungngo’t pinangtarakenko
simmantak, rimmungbo
ket saanto pulos agpullo.

Kayawakto ti panawen
ikiddayda’t talingenngen
kadagiti rabii ni umbi
wenno tiempo’t saning-i
ket mataginayon ni lailo
iti bukel nga intukitko.

//Clifton Pascua
April 1, 2007

Bukel

Nalamiis ‘ta dakulap
a nangitukit iti bukel.
Ket ni ayat
Nagrusing a nagsantak;
dimmakkel.

Kasla idi laeng kalman
a ti daga kimraang.
‘Di na kayat
ti makali, agsangit
a mamulaan.

Kasla idi laeng rabii
a nalusiaw dagiti bituen.
Mabainda a rummuar
ta ti rimatda
nalidem.

Kasla itay laeng bigat
a kimleb ni apo init.
Masadut a sumingising
ta dagiti rayana
kimriit.

Ngem ita pati puso
a nanglaylay, simmaranta
Kas man la bukel nga intukit
nalamiis a dakulap
iti nadam-eg a daga.


//Sherma E. Benosa
March 29, 2007; 11:20pm