Sika Amang

Natibkerka nga inkam’ nagsadagan
Iti naunday a panawen sika’t kamang
Adigi a nalinteg, naanus a nangiwanwan
Sarikedkedmi, sika laeng Amang.

Sika daydi bukel nagdisso nadam-eg a daga
A rimmusing, nagagawa ket rimmangpaya
Sika ti puon dagiti amin a nagtagisanga
Nga apon dagiti tumatayab, agawidda kenka.

Sika ti urat pagtalaytayan naruay a taraon
Maibisibis kadagiti sanga ken kadagiti bulong
Sika ti sappupo dagiti bunga ken sabong
Nabsogda’t pammagbaga, ta sikat’ salinong.

Palubusannak nga agkurno kenka, Amang
‘Toy bungat’ saringitmo, itandudona dayta nagan
Iti agnanayon sika ti innak pagtamedan
Tibker pammatim, isu’t innak pagtaklinan.


//Sherma E. Benosa; April 12, 2007; 11:07pm
For myAmang, Roman Bona Benosa
on his 88th birthday, March 28, 2007